Ariana Afghanistan Online

ښاغلی غني زیاتوي، که یو بل ومنو، یوه تګلاره جوړه کړو، وینه درېږي او له هغه پرته به وضعیت همداسې دوام ومومي: «زه غواړم غاړه مې خلاصه کړم او نوي نسل ته مې واضح پیغام دا دی چې ظرفیتونه پیدا کړي او نور د جنجال وسیله ونه ګرځي. ولې جنګسالاران او مفلس سیاستمداران له تاسو څخه ناسمه استفاده وکړي؟ ولې د نفاق وسیله کېږئ؟ څه باندې مو دعوه ده؟»

ولسمشر غني یو ځل بیا د نړیوال مشروعیت ترلاسه کولو لپاره داخلي مشروعیت اساس وباله او وې ویل، مشروعیت له پاسه نه راځي، بلکې مشروعیت له خلکو ترلاسه کېږي: «پرته له دې چې افغانان یو نظام مشروع وګڼي او ولس خپل حق ولري، نړیوال ورته مشروعیت نشي ورکولی.»

په ورته مهال ښاغلي غني د حکومت پر مهال د ځوانو کادرونو ځینې نیمګړتیاوې د پرمختګ پر وړاندې خنډ وبللې او په وینا یې، چې ډېر وخت به یې د ګډ کار پر ځای پخپلمنځي سیالیو کې تېرېده: «ځوان متخصصین دومره تشریفاتي وو، چې یو بل سره نه کېناستل. که ما ارګ ته نه غوښتلی، دوی به تل په دې اخته وو چې څوک باید چاته او چېرته ولاړ شي. په لحاظ د خدای او قران، وطن په څه حال کې دی او تاسې په څه باندې لګیا وئ، اوس به څه کوئ، اوس څوک درته دوه توته اهمیت درکوي!؟ دغه د اشرافیت کیسه باید زموږ له سره ووځي، واقعاً یو بد مرض دی او دا د جنګسالارانو تقلید و.»