د نیويارک د نوي ښاروال په توګه له ټاکل کیدو سره ديموکرات سوسيالیستي مشر زهران کوامي ممداني، په تاريخ کې خپل نوم درج کړ. هغه د دغه ښار لومړی مسلمان، لومړی جنوبي اسيا نژاده او لومړی په افريقا کې زيږېدلی ښاروال دی. د جنورۍ پر لومړۍ نېټه د خپلې دندې د پيلولو سره به نوموړی په تیره يوه پيړۍ کې د نیويارک تر ټولو ځوان ښاروال هم شي.
نوموړي د ولسمشر دونالد ترمپ، له ملاتړه برخمن کانديد کرټس سليوا، ته ماتې ورکړه. ترمپ، او ميليارډر ایلون مسک، د ممداني شديد مخالفت کړی وو.
تر بريا وروسته ممداني څه وویل؟
د نیويارک دې نوي انتخاب شوي ښاروال وويل چې پريکړنده بريا یې د دې خبرې ښکاروندي کوي چې د امريکا متحده ايالاتو ولسمشر دونالد ترمپ، ته ماتې ورکولی کیدلی شي. ترمپ، د دې ځوان مسلمان ديموکرات سوسيالست د تګلارو سخت سرې منتقد وو.
نوموړي زياته کړې: «په دې تياره سياسي عصر کې به نیويارک رڼا جوړيږي.»
ممداني، وويل: «نيويارکه، تا نن شپه د تغير راوستلو ماموريت سپارلی دی. زه به هر سهار له يوې موخې سره را ويښيږم چې دغه ښار به سر له سبا لا پسې ښه کوم.»
ممداني، د خپلو پلويان د ګرمو نعرو په ترڅ کې وويل: «زه د دودیز سوچ له نظره يو بشپړ کانديد نه یم. زه ځوان يم، له دې پرته چې ما هڅه وکړه ځان ستر ظاهر کړم. زه مسلمان يم. زه ديموکرات سوسيالیست يم. او تر ټولو ستر جرم مې دا دی چې له دې يوې خبرې له کبله هم معذرت نه غواړم!»
نوموړي خپله بريا د کارګر قشر برياليتوب وګاڼه، هغه خلک چې د نفقې د موندلو په لټه کې دي.
ممداني به اوس نېغ په نېغه له ترمپ، سره مخامخ وي چې نوموړي ورته نه يوازې د غچ اخیستونکو اقداماتو ګواښ کړی دی، بلکې تر دې حده یې ويلي ول چې که چېرې ګټونکی شي نو کيدای شي د هغه [ممداني] د «نيولو او له هېواده د ايستلو» هڅه وکړي.
ممداني، چې مور او پلار یې هنديان دي، د ترمپ، په مخاطب کولو سره وويل: «نيويارک تل تر تله د کډوالو ښار دی، داسې ښار چې کډوالو جوړ کړی او د همدوی په زيار چليږي او سر له نننۍ شپې به له همدوی څخه د يوه تر مشرتابه لاندې وي.»
نوړي وويل: «که چېرې څوک ملت ته ښوولی شي چې سړی څرنګه د دونالد ترمپ، په څېر شخص ته ماته ورکولی شي نو همدا ښار دی چې دی یې زيږولی دی.»
هران ممداني څوک دی؟
۳۴ کلن زهران ممداني، د نيويارک ښاروالۍ د ټاکنو په ګټلو سره د هېواد د وتلو ديموکراتيکو شخصتيونو په کتار کې د دريدو غير معمولي سفر بشپړ کړ.
په جون میاشت کې د ديموکرات ګوند په مقدماتي ټاکنو کې تر حیرانوونکي بريا وروسته د نيویارک خلک د ممداني له څېرې سره بلد شول چې ږيره لري او تل پرې مسکا خپره وي.
زهران په يوګنډا کې په يوه هندي نژاده کورنۍ کې زيږيدلی او د اوه کلنې راهېسې په امريکا کې ميشت دی. په ۲۰۱۸م کال یې د امريکا تابعيت ترلاسه کړ.
مور یې میرا نایر، د هند د اوديشا ایالت له راورکیلا ښار سره تړاو لرونکې فلم جوړونکې ده او پلار یې پروفيسور محمود ممداني يو يوګنډايي نژاده هندی د سياسي چارو کارپوه دی.
ممداني په ۲۰۱۵م کال کې د رپ موسيقۍ په نړۍ کې قدم کېښود خو د موسيقۍ په مسلکۍ نړۍ کې د قدم ايښوولو هڅې یې ډېر دوام ونه کړ. له هنرمند څخه سياستوال شوی ممداني ځان د دويمې درجې هنرمند ګڼي.
له سیاست سره تر علاقمندۍ وروسته هغه په ۲۰۱۸م کال کې د نیويارک له کوينز څخه د يوه استازي په توګه ټاکل شوی وو.
